De Wirtschaftsinformatiker

Donnerstag 15. Februar 2018

Mini Dame, Mini Herre, Dominik…

Jawohl, ier lesed alli richtig, es git en wiitere Newsletter. Ich hans mer nomal ahtah..

Schnell es paar organisatorischi sache:

• Hoi Sascha, isch de Bubblefuessball-Typ (Hier LINK will vill interessanter we de Newsletter) bisch jetzt au debii XD hesch der selber ihbrockt, sorry...
• De Energiemensch (letzschts Date het sich denn nie meh gmulde...)

So den wiiter zu dem Date vo Hüt:

Zerscht hani mit em it Stubä ah de Langstrass welle, aber mer hend eus denn churzerhand na schnell um entschide, dass mer doch beidi mal was neus uusprobiere chönnetet und sind denn im Kafi Dihei glandet, meega herzig, channs nume wiiterempfehle. Btw wäred mer it Stubä, hets denn mal en unterhaltsame newsletter geh, T Nathi isch am Gliiche aabig dete gsy, denn hete mer mini ganze Date debakel mal us ere objektive sicht mitübercho...

Also zu de SWOT- Analyse vo dem ganze:

Stärken

• Mer hend de ganz Aabig lang gredet
• Beidi hend sich au für t Interesse vom andere Interessiert
• Isch genau eso gsy wie bim schriibe
• mer hend au de ganz aabig lang glachet

Schwächen

• Chan gar nöd flirte isch aber iwie na herzig
• Isch bitz en workoholic
• het Pasta nöd eso gern  :o

Chancen

• Reiset au eso gern wie ich und isch scho ah vilne Ort gsy
• Het mer uuh vill interessants verzelle chönne woni noni gwüsst han

Gefahren

• Studiert in Rotchrüz, isch recht wiit weg
• Isch im Summer fertig mitm Studium und gaht wahrschindli go reise.

Soziodemografischi Date:

Name: Matthias

Alter: 24

Aus: Luzern

Fazit:

Mer gsehnd eus nomal :)

Xx

De Energiemensch

Mittwoch 31. Januar 2018

Mini Dame, Mini Herre, 

Jawohl, da bini wider. Ich Hans mer wider mal ahtah und bi letscht wuche nomal ah sones Tinder date…

Mittlerwiile weissi au nöd immer wie ich so glorios denebet griife, miis mami het au scho drüber glachet. Aber es git bitz unterhaltig…

Also ich ha mich eigentlich recht gfreut, will mich de Typ, normal und na sympathisch dunkt het, aber tüend die das nöd alli?

Uf jede fall hend mer so geg di 8ti abgmacht, und sind denn nachher richtig Niederdörfli gange, will er dete eh Bar im Sinn gha het, die het er zerscht mal uf ahhieb nöd gad gfunde, also hend mer nomal eh rundi dreht… isch ja keis Problem! Passiert jedem mal. Nachdem mer sie denn gfunde hend (ja anschiinend sind mer scho eimal drah verbiiglofe)

Guet und nachher sind mer ich dere Bar ghocket, isch schön gmüetlich gsy, abgseh vo dem Päärli wo so zimlich nebet eus gsesse isch und enand fascht uufgesse het, was en dezue tribbe het inere halb leere Bar genau det ane z hocke isch mer bis jetzt na schleierhaft XD will ihm isches na meh unagnehm gsy we mir ^^

Denn hend mer normal eso Smaltalk halt gmacht, was er genau Studiert het und was ich im Studium amel alles eso mache und eso. Und er isch halt scho bitz sonen Bünzli Schwiizer gsy, nöd meega uuffällig aber scho es bitz, ich nur eso denkt okay so schlimm chas nöd werde… oh mann…

Also isch iwie uufcho, dasi ja au englisch rede und denn ischs Thema recht schnell uf sis Masterabschlusspaper cho ^^ jawohl es isch denn eso langwiilig worde, dasi sogar gfrögt ha obi mer das doch schnell ahluege dörft. Und es isch eigentlich na interessant gsy, mueni zuegeh. Er eifach nöd…

Es hets leider würkli au nöd vill besser gmacht woner de abig denn mit dem satz beendet het:

«Hüt aabig isch eh beriicherig gsy.»

Soziodemografischi Date:

Name: Jannick

Alter: 25

Us: Züri

Macht: Maschienen Engineur Master Energy Science (ETH) (schafft jetzt die Energieversorgig)

PS: Ich han eigentlich keinerlei Problem mit Akademiker, und versueche mich für alles z interessiere, aber de het mer jetzt s lebe sehr sehr schwer gmacht^^ und mit dem Letschte satz hani bim allerbeschte wille würkli au nüt ahfange chönne.

Vo dem her, ufs nöchste Desaster Date und bis bald

Xx Laura

De Medizintechniker

Sonntag 10. Dezember 2017

Sodeli, da bini wider^^ und ja es git wider es Revival vom Interview!!! Freued eu, und wenn er na anderi gueti Forme kenned, löhnds mi wüsse, und nei bis ich en rap mache gaht das na ganz ganz lang…

Also rede mer über Marketing, iwie schaffets type ih letschter ziit immer besser sich via chat guet, selbstbewusst, sarkastisch, humorvoll, intelligent und eso wiiter darzstelle, und nachher, went sie in echt kenne lernsch und mal eis go trinke gahsch sinds völlig überforderet, wenn mer fraget wos gern ane würed oder was sie doch suscht eso mached. Iwie muen eh Konversation ja forwärts gah?! *facepalm*

Hüt isch es perfekts Biispil defür:

Also hüt es Date gha mit emne Medizintechniker, wo im Chat sehr selbstbewusst gsy isch und sich au sehr sehr guet vermarkte chönne het. Ich mein ich han en gfraget ob er luscht het was mit mer go trinke z cho, und nöd anderscht ume. Und das heisst ja was^^ ier wüssed, was für en fuule mensch ich det durre bin…

Interviewer: ÖÖÖÖH, du hesch ja es date gah! Wie isch gsy? Was hend er eso gmacht?

Laura: ja, voll. Mer hend eus am Bellevue Troffe und sind denn über de sechsilüüte Platz glaufe hend eus en Glüehwii gholt hend eh rundi gmacht und sind denn na durs NIederdörfli…

I: das tönt doch scho mal super! Verzell meh!

L: git nöd allzu vill meh z verzelle, er isch im grunde gnah na en interessante aber eifach au scho wider esonen verschupfte. Und er isch immerhin es paar jahr älter und weiss eigentlich woner ane will aber irgendwie het er mit das nie würklich eso genau übere bringe chönne.. findi chli schaad, will das wo er studiert isch meega interessant!

I: oh, okay, vlt doch nöd ganz eso positiv wie zerscht erhofft?

L: leider nöd würklich, sind zwar gueti und interessanti Konversatione gsy aber t Chemie het leider iwie eifach gfehlt… ufem weg is niederdörfli hend mer denn au na zwei Studie kolleginne vo ihm ahtroffe, das isch denn au gnueg weird gsy für ein aabig. Will die hend glaub mal ahgnah, dass mer ufemne date gsy sind …

I: ah Fuck, demfall en witere wo mer in sand setze chönd?

L: so schaad das au isch, aber ja. Wenn mer em alli antworte us de Nase zieh muen und sich selber eh Konversation bastle muen, macht das de aabig leider au nöd eso hammer…

Soziodemografischi Date:

Name: Renato

Alter: 25

Hobbies: bini mer nöd eso sicher, aber er trinkt gern Rum und Campari…

Fazit: Wider mal eso eine, wonis wider mal nachem halbe aabig bereut han de BH ahzoge z ha… obwohl er eso vill potential gah het. Oh well, wie mer ja eso schön seit. You win some you lose some…

Kei aangscht ich werde eu natürlich wiiterhin ufem laufende phalte mit all mine Desaster Dates, irgendwas amüsants oder entertainends sött ja amel scho drus use cho XD

Xx 

De Holzfäller

Samstag 9. Dezember 2017

Mini liebe, da bini wider… und sit neustem isch au miis mami ich dem Newsletter also Hoi Mum! 😃

Ich hole mal echli vor, da ich scho eis Date im verzug bin und na es bitz Kontext schaffe muen ^^

-De Fabian, s erschte guete Date het denn gfunde er muen sich drüh wuche lang nöd melde und chunnt irgenwen wider z chroche, wasi nöd eso hammer gfunde han… aber han em das au klar gmacht, dasi nöd eso uf Drama stahne, willi schlicht wegg kei ziitund geduld han für de seich … evtl und wüki nur evtl gönd mer denn mal im neue Jahr was go trinke, aber sind mer mal ehrlich, das passiert sicher nüm^^ wiiteri  frage zu dem Desaster eifach nache hacke…

-Zum Simon vo letschter wuche, er isch meega nett und au uuh interessant. Aber iwie isch er mer eifach chli jung übere cho… obwohl er au scho 23 isch, fehlt mer die ganz ziit chli was. Also hani em das au eso gseit, sind also Kollege.

Denn chömed mer doch mal zum Friitig die Wuche:

Ich han in züri abgmacht gha und ehrlich gseit nöd riesigi hoffnige gha, aber han denkt ich lahn mich mal überrasche 😊 het sich denn usegstellt isch en hammer typ, wo de ähnlich humor het, scho lang nüm eso vill glachet amne aabig.. und das er au en ähnliche musig gschmack het. Also hend mer eus am HB troffe und sind denn zerscht mal ide münster Bar glandet. Dete hend mer was trunke und nüm uufghört rede! Hend beidi ähnlichi Reiseziel wo mer mal na ane wend und wos eus denn chli z voll worde isch dete, hend mer entschide dusse chli ume laufe, gad ich dere ziit wos in züri eso fescht gschneit het, also isch alles chli still gstande und es het denn am fluss entlang eh chliini Impromptu Schneeballschlacht geh ^^ was will mer meh, amne erschte date? XD zum wider uufwärme sind mer denn am Sechsilüüteplatz is stübli na en glüehwii go trinke und nachher denn so um di eis wider an HB.

Soziodemografischi Date:

Name: Adi

Alter: 23

Job: Holzfäller am Zuggerberg.

Fazit: De willi wider gseh, will wenn mer ah eim Aabig scho meh we vier stund eifach über Gott und die Welt unterhalte chan und denn na schnell eh Schneeball schlacht aneleit, denn isch das sicherlich es zweits date wert, find ich jetze. Mal luege was er meint^^ het aber gueti vorruussetzige will er genau eso reisefreudig isch wie ich. S einzige; er het na kein Harry Potter film gseh!! 😲 das chönnt es kriterum sii…

Alles liebi und bis in es paar Minute, woni s andere Date reviewe XD

Xx

PS: Mer hend eus über Silvester nomal troffe, Film gluegt (ja Harry Potter) und denn sini Mitbewohner kenne glernt und en meega coole aabig gha! und bi denn spöter ide wuche bini ufe uf Chur willi eigentlich Plän gha han, aber denn sind disi churzfristig abgseit und ha denn gad ziit gha, also het er gfunde, er chann mich doch in chur go bsueche cho, zwar überraschend aber na witzig gsy, s einzig blöde isch gsy, dassi am nögschte tag na uuh vill fürt schuel mache han müese, und er sich demnach selber beschäftige het müsse. 

und ich han denn au nöd würkli guet, en ganze tag lang schaffe chönne, wenn eine am andere endi vom Sofa sini ziit mit lese oder so verbringt. Isch mer denn langsam aber sicher uft nerve gange... also hend mer eus denn am aabig uf de Weg gmacht, zum zeme uuf de zug gah, ich denn in Ziegelbrugg usse und er in Thalwil. Aber de Zug het denk nach de Burglind in Walenstadt eifach mal eh vollbremsi anegleit... und so sind mer dete steckeblibbe... Luut SBB-Durchsage isch de Verkehr denn zwüschet Ziegelbrugg und Züri ihgstellt worde und mer hettet emne Taxi ahlüte müese. Denn hani aber hei ahglüte und miis mami und de Brüeder sind cho mich go abhole. Ich han denn nettikeitshalber de Adi au mitneh müese, will de wär ja nameh uufgschmisse gsy, we ich... Wo er sich denn mim Mami vorgstellt het, het sie recht schnell gschnallt, dass er de Holzfäller isch und het das au ih einere Luutstärki uselah XD Was für alli beteiligte liecht weird gsy isch, aber ja that's my mum... Mis Mami isch denn eso begeischteret gsy vonem, dass sie unbedinngt welle het, dass er zu eus chunnt, ich nöd unbedinngt, aber es isch eso spaat gsy, also isch er denn am schluss au na mit hei cho -.-

und am nögschte morge het mis mami allenernscht mit em na Bäum ahgluegt XD

De Architekt

Samstag 2. Dezember 2017

Liebi Lüüt,

Es isch wider eso wiit XD ich bi wider mal ufemne Date gsy XD Ja ich Weiss ier hend sicher sehnlichscht druf gwartet... (nicht)

Schnell es paar organisatorischi sache:

• Hoi Tim, Hoi Sandy ier sind jetzt au ih dem Newsletter dinne, wenn er nöd welle hend, pech gha.. ah ja! HOI DOMINIK!! (Fründ vo de Salome)
• Denn zu de Type, das wo er ja all ghöre wend^^ Also die letschte zwei hend sich nie meh gmulde, also genauer, de Fabian het nie meh gantwortet, bis hüt am morge. Und de Lukas han ich den meh oder weniger sanft abgwimmlet.

So den wiiter zu dem Date vo hüt:

Mir sind in Luzern zeme go Zmittag esse, imne hammer resti, wos mega vill verschidnigi Ravioli geh het! Den hend mer en chliine spatziergang durt Stadt gmacht und hend t Stadtmuur ahgluegt, wills vo dete uus eh hammer uussicht  über t stadt het, den het er na es mega herzigs teehuus gfunde wo mer na go tee trinke sind. Das chani au nume wiiter empfehle!

So, den chömed mer doch zu de SWOT- Analyse vo dem ganze:

Stärken

• Mer hend die ganz ziit rede chöne
• Hend sehr ähnlichi interesse
• Interessiered eus aber au für das wo der ander macht
• Het eh schwächi für alti kameras
• Het esse und spezifisch Schoggi genau eso gern wie ich

Schwächen

• Ich recht, recht schüch
• Nöd immer eso selbstbewusst, wie bim schriibe...
• Het nöd eso vill ziit
• Chan gar nöd flirte
• Isch bitz en workoholic

Chancen

• Het mer uuh vill interessants verzelle chönne woni noni gwüsst han
• Chönntet zeme ah die gliiche konzert gah
• Chönnt guet passe will mer bi villem die gliiche ahsichte hend.

Gefahren

• Workaholic wo nie ziit het
• Wird wahrschindli druf uselaufe, das es nur fründschaftlich isch, will er recht schüch isch
• Er gaht nachher den wider zrugg uf Bern -> Distanz...

Soziodemografischi Date:

Name: Simon

Alter: 23

Aus: Luzern

Fazit:

Ich han Luzern nöcher kenneglernt und en mega liebe, guete mensch kenneglernt. Mer Lueged mal.

Xx

De Detailhändler

Samstag 11. November 2017

So da s nach em ersche teil esone grossi nachfrag geh het:

Und nach mehrfachem zensiere, tön ich denn hoffentlich nume na halbe wie eh bitch…. Dasmal in Form vomne Theatherstuck oder wie au immer das journalistische Format heisst…

Und wider Hoi Dominik!! ;P

Präsentier ich teil zwei vo mim umenandgedate…

Einstieg

Also zum mal chli de Mood uufbaue, ich bi am Friitig nami hei cho und han na mitm Mami poschtet, mer sind zuefälligerwiis uf eh fläsche Braulio gstosse (kei angscht de het denn scho nomal en uuftritt ih dere gschicht) die hend mer nöd eifach eso ligge lah chönne also hani en poschtet. Denn sind mer dihei ahcho hend uuspackt und denn hets ahgfange schiffe, und mir sind ussversehentlich beidi ihgschlaafe mini mum und ich und sind denn erscht wider so geg di sechsi uufgwacht… Ich de gröschti ahschiss vom lebe, chönd er eu ja vorstelle… also hani mitm Brüeder en Braulio gshottet macht ja alles besser (Spoiler, nei machts nöd, glaubed mer) und denn hani mi vor de achte uf de weg gmacht, das ich denn pünktlich am Stadi bin. Han denkt wird sicher luschtig, will mer hend ja vorher bim chatte na oft gwitzlet und eso wiiter. Also hani mi zeme grafft und ufs beschte ghofft.

Hauptteil

Mal am Stadi ahcho, hend mer eus gfunde und hoi gseit, denn sind mer is Niderdörfli hindere glaufe, ich bi mal devo uusgange, das er wenigschtens en grobe plan het wo ane und eso, er hets ja vorgschlage…(er het kein plan gha). S erschte gspröch vo dem aabig het demit ahgfange, das er mir verzellt het wie sin tag gsy isch und denn ischs die nögscht viertel stund so wiiter gange über wo das er sini haar schniidet und das er sich sehr für sportschueh interessier XD ich gibe zue ich lose lüüt sehr gern zue und han (meischtens) geduld. ABER bi dem isch mers Gsicht fascht ihgschlaafe. Und zu dem ane, het er au na vor sich anegflüschteret, wie es müüsli. Unglaublich für eine wo anduurend im Chat blöödi Witz riist. Guet ich han denkt vlt isch er ja nervös, wiso kein plan aber has mal uf das gschobe… Stellt sich use es liiht nöd ah nervosität, er segi früehner sehr sehr schüüch gsy… das weri sini begründig warum ich ah dem Aabig glaub guet drüh frage über mich selber beantwortet han und de rest Infos über ihn gsy sind ^^ Ich muen sege ich bi gar nöd beiihdruckt gsy. Aber ebe you win some you loose some.

Schluss

Ich han denn en uusred bracht warum ich früehner hei muen, und denn bim tschüss sege, was au weird gsy isch het er denn gseit; ja er schriibi denn wider, und ich nur so hm, luege mer mal vlt au nöd… Wiiters vorgehe? Ich gahn die nöchste Jahr nüme du Uster in Migros und han au sehr vill z tue, wenn die direkt frag chunnt bini denn au direkt und seg, nei aber de arm het denn doch en recht verschupfte iihdruck gmacht, da hanis em nöd na am gliiche aabig inedrucke chönne., ganz eso gemein bini denn au nöd.

Soziodemografischi Date

Name: Lukas

Alter: 22

Wohnt: Uster

Fazit: Also ehrlich gseit hets sich nöd mal glohnt en BH defür ahzzieh. :/

Fazit II: Schwiizer mane sind völlig überforderet mit dates (sorry Sämi & Dominik ier sicher nöd, ier mached das guet^^)

Xx

De Schiri

Freitag 10. November 2017

Also, da ich sone groosi nachfrag übercho han, wie mis date geschter glaufe isch gits eh zemefassig, in interview form, warum? Ich ha gad mini kreative 20 minute…

Und ich ha de Salome ihrem Fründ versproche, dass er is CC chunnt, Hoi Dominik!

I: ÖÖÖÖh Laura! Du hesch ja geschter es date gha! Wie isch gsy?

L: Ja, nöd schlecht.

I: Was hend er denn gmacht?

L: Er het mi abgholt, und denn sind mer uf Vaduz (ja es isch würkli eso chli) es bitz go umelaufe, und denn ih sini lieblings Pizzeria.

I: und wie isch gsy? Hets der gfalle?

L: ja voll, isch eh cools restaurant gsy. Und s esse meega fein!

I: Und s date?! Wie isch er esi gsy?

L: glücklicher wiis vill nervöser als ich, und eso bini voll cool überecho. Aber er isch voll sympathisch, bitz schüch aber hets meega guet gmacht und mer hend en super aabig gha 😊

I: echt?!

L: Ja voll! Scho lang nüm eso vill glacht! Sind glücklicherwiis uf de gliiche wälle längi gsy.

I: Das isch doch schön! Aber chum verzell, hets nüt geh wo nöd guet gsy isch?

L: nüt grooses eigentlich, nei. Er het en St. Galler dialekt, aber ich ha ja eh züri schnurre, da chan ich gar nüt sege^^

I: guet, denn fröge mer doch mal was anders, zu wie vill prozent passt er zu dir und zu wie vill nöd?

L: phu gueti Frag, ich hett jetzt mal gseit gueti 80% passts, mit stiigender tendenz? Und 20% hani kein plan, wasi da gad am ahstelle bin…

I: denn wend mer na wüsse, gits es wiiters date?

L: ja, ich hett scho gseit, mer müend eifach ziit finde…

I: Das tönt doch scho mal super! Aber mer hend au ghört, das es hüt na es anders date git in Züri, stimmt das?!

L: Öhm, ja doch, das stimmt. Zu miner verteidigung, hani das na vor dem geschter veriihbart, und han nöd allzu groosi hoffnige, aber wer weiss, vlt haut de hüt mich sogar us de Socke..

I: Denn wend mer aber wüsse, wirds en teil 2 geh, vo dem Mail oder sogar nomal eis für das date Hüt?

L: Je nach nachfrage, chan sich das scho iihrichte lah.

Soziogemografische Daten:

Name: Fabian

Alter: 25

Aus: Vaduz

Sodeli, da ich hüt hoffentlich für gnueg unterhaltig gsorgt han wünsch ich eu allne ganz es schöns wuchenend! Und bis bald!

PS: Und ja er chan guet küsse^^

Xx